فەلسەفەی هونەر

تێگەیشتن لە واتای هونەر پێویستی بە دەرخستنی «چییەتی»ی هونەر هەیە. بۆ دەرخستنی چییەتییەکە دەبێت ئەو خەسڵەتە بنەڕەتییە دیاری بکەین کە بەرهەمێک دەکات بە هونەری و یەکێکی دی بە نا-هونەری. هەڵبەتە چالاکیی هونەری لە مێژوودا پێش چالاکیی بیر‌کردنەوەی فەلسەفییانە و تەنانەت بیر‌کردنەوە لە هونەریش دەکەوێت. وەکو دەزانین، مرۆڤ، پێش دامەزراندنی شارستانییەت و سەرهەڵدانی بیر‌کردنەوەی فەلسەفییانە، لە سەر دیواری ئەشکەوتەکان وێنەی ئاژەڵی کێشاوە، بەڵام نەیتوانیوە لە واتای ئەو چالاکییە تێبگات و ڕاڤەی بۆ بکات. لەگەڵ پەیدابوونی بیر‌کردنەوەی فەلسەفیدا، بە تایبەتی لە سەردەمی ئەفلاتونەوە، واتای ئەو چالاکییەی بە هونەر دادەنرێت، بووە بە بابەتی توێژینەوە.