ئەحمەد موختار جاف | شاعیری نێرکسی چاو و پەرچەمی زوننار

ئەحمەد موختار جاف ساڵی ۱٨۹٨ی زایینی لە شاری هەڵەبجە لە دایک بووه. کوڕی وەسمان پاشای گەورەی جاف و عادیله خانم بووە.
ئەحمەد موختار بێجگە لە زمانی کوردی، زمانەکانی فارسی، تورکی، عەڕەبی و کەمێکیش ئینگلیزی زانیوە، ئەحمەد موختار و تاهیربەگی برای دوو شاعیری ناوداری کوردن کە هۆنراوەکانیان لایانگرانێکی زۆری هەیە، ئەم شاعیرە بەتوانایە لە هەموو بوارەکان‌دا شێعری نووسیوە و هەڵبەستی نیشتمانێکانی لە ڕیزی پێشەوەی هەڵبەستە نیشتمانێکانی سەرەتای سەدەی ڕابووردوو دادەندرێ.

ئەی وەتەن! جەننەتی یا ڕەوزەیی ڕیزوانی تۆ؟
باعیــــسی کەیفـــی دڵــە باغ و گوڵستانــــی تۆ
تۆزەکەت ســـوورمەیە بۆ چاو و عەبیرە خاکت
ڕاســـتە گەر بێت و بڵێــم قیبلەیی کوردانی تۆ

ئەحمەد موختار ساڵی ۱۹۳۵ی زایینی لە تەمەنی ۳٨ ساڵی‌دا لە کاتی پەڕینەوە لە چۆمی سیروان کە سواری کەڵەکێک بوو، لە لایان چەند کەسەوە کوژراو و جوانەمەرگ بوو و تەرمەکەی لە گوندی عەبابەیلێی نیزیکی هەڵەبجە بە خاک سپێردراوە.
ئەم کتێبە کۆبەرهەمەکان و ژیاننامەی ئەو شاعیرە بلیمەتە لە خۆ دەگرێت.