مێژووی نوێی کورد و کوردستان

ئەم کتێبەی لەبەردەستتە هەوڵێکە بۆ بەداواداچوونی ڕووداوە سیاسییەکانی مێژووی نوێی کورد و کوردستان کە لە جەنگی چاڵدێرانەوە لە ساڵی (١٥١٤)وە دەست پێ دەکات، تا کۆتایی شۆڕشی ئاگری(ئارارات) لە ساڵی (١٩٣٠). لە سۆنگەی بەرپرسیارێتیمان وەک مێژوونوسێک، هەستمان بەوە کرد کتێبخانەی کوردی پێویستیی بە پەرتوکێکی گشتگیر هەیە سەبارەت بە مێژووی نوێی کوردستان کە تێیدا بە شێوەیەکی بابەتییانە و بە جێبەجێکردنی ڕێبازی توێژینەوەی مێژووی بابەتەکەمان خستووەتە بەردەستی خوێنەر، ئامانجمان ئەوە بووە کە قۆناغەکانی مێژووی نوێی کورد و گۆڕانکارییەکانی بخەینە بەرباس و بەدواداچوونێکی بابەتییانەی بۆ بکەین. ئەوەتا لە قۆناغێکدا چەندین میری بەتوانا و بەهێزی تێدا هەڵکەوتوون کە تا ئێستاش باس و سەربردەیان بەردەوام بەر گوێمان دەکەوێت بە تایبەتی لە ڕووی فراوانخوازی و دەستدارییان کە وڵاتانی زلهێزی دەوروبەر حیسابیان بۆ کردوون، کەچی لەقۆناغێکی دیکەدا دەبینین گەلی کورد بووەتە قووربانی هێزە دەرەکییەکان و ڕۆڵی خۆیان بە نەرێنی لە کوردستاندا دەگێڕن، بەڵام لە قۆناغێک لە قۆناغەکانیدا درک بەوە دەکەین کە ناسیونالیزمی کوردی بە ڕادەیەکی دیار پەرەسەندنی بەرچاوی بە خۆیەوە بینیوە وەک لە نیوەی دووەمی سەدەی نۆزدەدا، دواتر ئەو قۆناغە مێژووییەی کە بۆ کورد ڕەخسابوو بۆ دامەزراندنی دەوڵەتەکەی لە دوای جەنگی یەکەمی جیهانیەوە چەندان کۆسپ و تەگەرەی هاتە ڕێ، زۆر ئەستەم بوو بەسەریاندا زاڵ بێت