قەرەج

ڕۆمان: قەرەجنووسین: سەلیم حەقیقی
پاتۆڵێکی پینەکراوی چڵکن و کراسێکی بۆر و تۆزاوی خەت خەتیم لەبەر دابوو، جووتێک پێڵاوی قایشیی ڕەشم لە پێ بوو، کە لاقم دەردەهێنا بۆنی فازیلاوی (زێراب) لێ دەهات! قامکی لاقم لە چەند شوێن بریندار ببوون، کە پێم ئارەقەی دەکرد دەبرژانەوە. نەمدەزانی بۆ گیرفانم بگریم، بۆ ژیانی نادیارم، بۆ هەموو خولیا و ئاواتەکانم یان قامکە بریندارەکانم، بۆ لیباسە شڕەکانم یان بێ‌بەزەیی بەر دەرگای دادگەی بێ‌داد!
ژیانی ناو زیندان زۆر سەخت و دژوار و ناخۆش بوو. منیش کە کۆڕی بنەماڵەیەکی هەژاری کەم‌داهات بووم، یان وێنەی ئەزیزانی بەندکراوەکانم بە پارەیەکی کەم دەکێشایەوە یان بە زەنگیانە کاری دەستیم بۆ خەڵک دروست دەکرد تاکوو بتوانم ژەمێک لە ناو ڕێستورانی ناو زیندان بابۆڵەیەک کەباب و کۆکاکۆلایەک بخۆمەوە.