تەندووری ژنانە

تەندووری ژنانە

ئەردەڵان باستانی

بابەت: ڕۆمان عەقڵی ئەو منداڵانە نەیدەبڕی، کە چۆنە ئەوە بەفر باریوە و ئەو کیژە جوان و خان‌ومانە کە دەستی لە ڕەش و سپی نەدراوە خۆی داپێچاوە و پێش هەموو پیاوی ئەو گەڕەکە چۆتە سەربان و بانی ماڵیوە و بەر دەرگای خۆی لەو کووچە تەنگ و باریکە خاوێن کردۆتەوە. من ئەو ڕۆژە کە سەربانەکان خەبەریان هێنا کە ژنێک دەستی داوەتە وەروەرە و بەفری لە سەر ماڵیون زانیم ئەو ژنە شتێکی بە دەمەوەیە. کە دیوارەکان خەبەریان هێنا ئەوە ئەو ژنە پیاوی بردۆتەوە ژوورێ و نە ئەو شەوە و نە بەیانییەکەی و ڕۆژی دواتریشی یەک قڕان چییە دەستاودەست نەبووە، زانیم ئەو دێڵە بەرەڵایە هاتووە ئەو شارە بە یەک‌دا دا. خۆ هەر وەک دەزانی من بۆکانم. شاری شێعر و خۆشەویستی و هونەر و گۆرانی، من شارێکی دڵ‌کرمن و ئەوەندە موسوڵمان نیم، خۆ دەزانی من بۆکانم، ئەوەندەی توانیومە غەریبم ڕاگرتووە، بەزەییم بە هەمووان‌دا دێت، هەمووان دەلاوێنمەوە، ئێرە ماڵی هەمووانە، من وەتەنی پیاوانەی هەموو ژنێکم.”